“CONSTITUCIÓN NISQATAM WASILLAYPI YACHANI” PROGRAMATAM TRIBUNAL CONSTITUCIONAL PAQARICHIN

Tribunal Constitucional (TC) wasipas, Educación Ministerio llamkasqantam kallpanchallachkantaq hinaspa huk programata paqaricchichkan “Constitución nisqamantam wasillaypi yachani” sutiyuqta, warmakunapa yachayninta huntapachinapaq.

“Constitución nisqamanta warmakuna yachapanankutam maskachkayku, derecho nisqakunatawan sunquchakunankupaq, hamuq pachakunapi chaymanta rimarinankupaq chaynallataq chaywan amachakunankupaq”, chaynatam rimariykun TC umalliq Marianela Ledesma Narváez.

“Constitución nisqamantam wasillaypi yachani” qallariq programan YouTube nisqapiña kachkan, Tribunal Constitucionalpa canalninpi, hinallataq facebook nisqapipas. ¿Imataq Constitución? chaymi kachkan qallariq programapi yachanapaq.

Educación Ministerio internetllanta clases ruwachisqanmanmi, TC wasimantapas kallpanchamuchkanku warmakunapas wasillankumanta Constitución nisqata riqsinankupas. TC umalliq willakusqanman hinaqa COVID19 sasachakuypa chawpinpi, allinmi kanqa warmamantapacha Constitución maytupi kaq derechunkunamanta chaynallataq ima ruwanakumantawan riqsinankuqa.

«Munallaykumantaqmi, tayta mamakunapas warmankunawan kuska Constitución nisqamanta riqsiykunallankutataq», niykamun.

Riqsirqachimullantaqmi, kay programam quechua simipipas paqarichkan, huk llaqtakunawan tinkunasqa kanapaq.

Hina qipanmanmi willarqakamullantaq, kay qallariynin pachapi chunka programakuna lluqsimunqa, Constitución nisqamanta yachanapaq chaymantapas derecho nisqakunamantawan yachanapaq: kawsayninchikkunamanta, huk runakunawan niraq niraqlla kanapaq, suyuyuq – sutiyuq kanamanta, qali kawsayninchikmanta, huñunakunanchikmanta hinallataq educacion nisqata lliw aypananchikmantawan.

Chaynallataqmi, tawa cuento nisqakunatapas willakamunqaku: Constitución nisqata riqsispa, riqsichinapaq watukuymanta, Perú suyupa hawanta pawariykuspa hinallataq Constitución – Tribunal Constitucional niqakunamantawan. Sapankama willakuykunam yaqa pichqa minutuskama mastarikunqa.

Hinaspapas, kay willakuykunam señas rimariypipas qispisqa kanqa, chaynapi hukniraq simikunapi rimaq warmakunamanwan aypananpaq.

Tukuykunapaqñataqmi riqsirqachimun, martes hinallataq jueves punchawkuna programakuna lluqsinqa, cuento willakuykunañataq sábado punchawkuna 11 achikyay pachamanta.