2020 WATAPI PROCESO NIQAKUNATAM TC INTERNET LIKAPI TIYACHIN

Tribunal Constitucional (TC) wasipa presidentan Marianela Ledesma Narváez rimarisqanman hinaqa, 2020 watapi chaskisqanku proceso nisqakunata internet likaman churachkankuña, chayna ruwaykunawanmi maskachkanku utqayllaman llamkayta, COVID19 sasa punchawkunapi Perú suyu kasqanrayku.

Chaynallataqmi nirqamun, kay sasa punchawkunapi llaqtayuqkunapas suyachkanku llaqta umalliqkunapa hinalla llamkayninkuta, salud, justicia, educación, carcel wasikunapi, huk llamkana wasikunapipas.

Tribunalmanta pacham utqachichkankuña internet likallanta litigante nisqakunapas yanapakuy mañakusqankuta qatipanankupaq.

“2020 watapi proceso nisqakunam kunanqa internet likallapiña kachkan, ñawpaq pachakunapiqa chayna kananta suyakurqa, kay watapi proceso nisqakunamantam tantyaykunatapas qispichimuchkaykuña” nispam rimariykun.

Kay willakuykunapa hawanmanmi riqsirqachimullantaq, COVID19 kasqanrayku magistradukunapas Pleno virtual sutichasqa huñunakuyta internet likallanta ruwachkanku, sapankama magistradukunam wasikumanta pacha virtual huñunakuypi rimarinku, tantyanku hinallataq expediente nisqakunapaqpas vutukunata qispichinku.

Chaynallataqmi, Audiencia virtual nisqatapas ruwarunkuña, chaypi abogado hina amachaypi llamkaqkunapas wasinkumantapacha rimarinankupaq, google hangouts meet sutiyuq internet likantakama.

TC umalliqmi riqsirqachimun, kay tantyaykunas kachkan yanapakuy mañakuqkunata yanapanapaq, Perú suyu sasa punchawkunapi kachkaptinpas yanapakuy utqayllaman kananpaq.

“Musuq pachakunapi llamkaykuna kasqanman hinañam Tribunal Constitucional wasipas llamkachkan, kay ruwaykunam suniyachiwachkanku utqayllaman llaqtata yanapanaykupaq”, nirqun.